سياسة الخصوصية

فرحنا (farahna.net) خدمة لإنشاء دعوات زفاف وخطوبة وكتب كتاب رقمية. السياسة دي بتوضّح البيانات اللي بنجمعها، وليه، وإيه حقوقك عليها.

لو عندك أي سؤال أو طلب بخصوص بياناتك، كلّمنا على واتساب (+20 150 543 8380) أو على support@farahna.app.

بيانات الحساب: رقم الموبايل أو البريد الإلكتروني (بتدخّل واحد منهم على الأقل، أو الاتنين لو حبيت)، والاسم المعروض. كلمة السر بتتخزّن مشفّرة (Argon2) ولا إحنا ولا أي حد يقدر يقراها.

محتوى الدعوة: أسماء العروسين، تاريخ ومكان الفرح، النصوص اللي بتكتبها، الصور اللي بترفعها، والأغنية اللي بتختارها.

رقم للتواصل: لو نشرت دعوة من غير حساب، بنسألك رقم موبايل اختياري عشان نقدر نبلّغك قبل ما رابط التجربة يتوقف. مبنستخدمهوش لأي حاجة تانية.

بيانات الدفع: صورة إيصال التحويل، ورقم المحفظة أو يوزر إنستا باي اللي حوّلت منه — عشان نطابق التحويل ونتأكد إنه وصل. إحنا مبنستقبلش ولا بنخزّن أرقام كروت بنكية على الإطلاق.

بيانات الجلسة: رقم الـ IP ونوع المتصفح والجهاز، للحماية من محاولات الدخول المتكررة وإدارة تسجيل الدخول.

لما ضيوفك يفتحوا دعوتك، ممكن يسجّلوا: الاسم، تأكيد الحضور وعدد المرافقين، تهنئة مكتوبة، صور، ورسالة صوتية.

البيانات دي بتخصّك انت كصاحب الدعوة، وبتظهر لك في لوحة التحكم بتاعتك. إحنا مبنبيعهاش ولا بنشاركها مع أي طرف تالت، ومبنستخدمهاش في أي تسويق.

الصور والرسايل الصوتية من الضيوف بتفضل تحت مراجعتك — انت اللي بتوافق على اللي يظهر في الدعوة.

باعتبارك صاحب الدعوة، انت مسؤول عن إنك تكون متأكد إن ضيوفك موافقين على مشاركة بياناتهم وصورهم على الدعوة.

أول ما تفتح الموقع بنسألك سؤال واحد: نشغّل أدوات القياس ولا لأ. مبنشغّل ولا واحدة منهم قبل ما تدوس «أوافق» — لا كوكيز إعلانية، ولا سكريبت، ولا طلب واحد للشركات دي. ولو دوست «أرفض» الموقع بيشتغل كامل من غير أي نقص.

الأدوات اللي بنسأل عنها، ودي كلها شركات برّه مصر:

Google Analytics 4 (جوجل — أمريكا) — إحصائيات زيارات مجمّعة: كام زائر، جم من فين، وأنهي صفحات بيتفرجوا عليها.

Microsoft Clarity (مايكروسوفت — أمريكا) — بيسجّل حركة الماوس والدوسات وشكل تفاعلك مع الصفحة، عشان نعرف إيه اللي مش واضح ونصلّحه.

Meta Pixel (ميتا — أمريكا) — لقياس نتايج إعلاناتنا على فيسبوك وإنستجرام وعمل إعادة استهداف.

TikTok Pixel (تيك توك — سنغافورة/أمريكا) — لقياس نتايج إعلاناتنا على تيك توك وعمل إعادة استهداف.

فين مبنشغّلهمش خالص: صفحات الدعوات (`/w/...`) ولوحة الإدارة. يعني لو ضيف فتح دعوة فرح من واتساب، مفيش أي أداة قياس بتشتغل عنده ولا بتتسأله أي سؤال — هو جاي يشوف دعوة، مش زائر عندنا. ده مقفول في الكود نفسه ومش متوقّف على موافقة حد.

تغيير رأيك: من «إعدادات الخصوصية» تحت في آخر أي صفحة. سحب الموافقة بنفس سهولة إعطائها، وبيسري فورًا.

كوكيز لازمة للموقع يشتغل: فيه كوكيز مالهاش أي علاقة بالقياس ومبنسألش عنها لأن الموقع مش هيشتغل من غيرها — كوكي تسجيل الدخول اللي بيخلّيك فاضل داخل على حسابك، وكوكي المسوّدة اللي بيخلّي الدعوة اللي بتبنيها ترجعلك. مبتتشافش من أي شركة تانية.

بنستخدم كمان Railway لاستضافة الموقع وNeon لقاعدة البيانات وUpstash للتخزين المؤقت — دول بنية تشغيل الخدمة نفسها، مش أدوات تتبع، وبياناتك متخزّنة على سيرفراتهم.

باقة بلوم: الرابط والمحتوى شغّالين ٦ شهور من تاريخ التفعيل.

باقة بليس: الرابط شغّال سنة من تاريخ التفعيل. باقة فوريفر: الرابط والمحتوى بيفضلوا مدى الحياة.

التجربة المجانية: الرابط بيتوقف بعد ٢٤ ساعة، لكن المحتوى بيفضل محفوظ في حسابك ومش بيتمسح.

صور إيصالات الدفع بتفضل محفوظة للمراجعة المالية ومنع التلاعب.

تقدر تطلب مسح حسابك وكل بياناته في أي وقت — كلّمنا وبنعملها.

تقدر تطلب: نسخة من بياناتك، أو تصحيح أي بيانات غلط، أو مسح حسابك بالكامل، أو إيقاف استخدام رقمك في أي تواصل.

ابعتلنا على واتساب (+20 150 543 8380) أو support@farahna.app وبنرد في أقرب وقت.

كلمات السر بتتخزّن مشفّرة، والاتصال بالموقع كله عبر HTTPS، والوصول لبيانات العملاء محدود بالفريق اللي محتاجه للمراجعة والدعم.

مفيش نظام آمن ١٠٠٪. لو حصل أي اختراق يمسّ بياناتك، هنبلّغك.